PIDARTA BASA BALI

NGRAJEGANG BUDAYA JAGAT BALI

Suksma aturang titiang majeng ring pangenter acara antuk galah sane kapaica ring titiang.

Inggih Ibu Guru sane wangiang titiang,
Para semeton kelas IX.1 sane banget tresna sihin titiang.

            Sadurung titiang ngelanturang atur, lugrayang titiang ngaturang angayu bagia majeng ring Ida Sang Hyang Widhi Wasa, duaning sangkaning asung kerta wara nugrahan Ida, mawinan titiang miwah ida dane sareng sami prasida mangguh kerahajengan mapupul ring genahe iriki lan nenten ja kirang punapa-punapi, malarapan antuk ngaturang pengastungkara,

“Om Swastyastu”,

            Inggih ida dane sareng sami sane kusumayang titiang, ring galahe sane becik puniki lugrayang titiang matur amatra ngeninin indik RAJEG BALI malarapan antuk pidarta sane mamurda NGRAJEGANG BUDAYA JAGAT BALI.

            Inggih ida dane sareng sami sane banget tresna sihin titiang,
            Sekadi sane sampun kauningin indik jagat Bali sane sampun kaloktah antuk seni lan budayannyane ngantos ke dura negara. Pulau Bali kabaos pinaka daerah tujuan wisata manca Negara. Akeh para wisatawan domestik miwah dura negara sane rauh ke Bali matetujon ngaksi sekancan seni lan budaya sane pinih akeh lan sarat antuk nilai-nilai religius kaagamaan. Sampun sami uning tur pawikan, punika sami ngawinang jagat Baline kaparinama olih para janane "pulau seribu pura, pulau dewata, pulau surga utawi the last paradise".

            Nanging sekadi jamane mangkin, seni lan budaya lokal punika pacang nyangsang nyusut. Napi malih sepengaruh para wisatawan dua negara lan domestik sane pacang ngeninin kajegang budaya bali. Duaning asapunika budaya baline patut kapiara, katitenin mangda prasida ajeg kanti kawekas. Sepatutnyane budaya saking dura negara punika kapilah-pilah sane becik lan nenten becik miwah sane encen sane mawiguna. Sane mangkin akeh kapanggih truna-truni lan para jana sane lianan sane nenten urati teken budayannyane. Sepatutnyane, iraga Pdados truna-truni ngutsahayang ngelestaring adat tradisi seni miwah budaya lokal.

            Inggih pare semeton sami sane baktinin titiang,

            Malarapan antuk punika irage sareng sami sane wiakti dados krama Bali ngutsahayang  ngajegang Bali antuk budaya lan seninnyane. Utsaha ngajegang Bali puniki mangdane nenten  kalaksanayang olih adiri utawi pupulan para janene sane uning tekening budaya kemanten, nanging olih irage sareng sami sane dados krama Bali, utamannyane sane maagama Hindu, saantukan agama Hindu ring Bali nenten je prasida palas tekening kesenian lan budaya sane sampun rumaket ring soang-soang upacara yadnya ring Bali. Iraga sareng sami patut ngrajegang budaya bali mangda budaya baline tetep asri lan lestari. Yening budaya baline nenten kapiara sinah sampun pacang rered tur runtuh.

            Silih sinunggil sane kanggen nguratang tur ngewerdiang seni budaya inggih punika wantah Basa Bali, Busana adat, Tetabuhan lan Tari-Tarian druene sane pinaka tetamian utawi warisan saking leluhur Bali. Punika ngawinang iraga patut bangga dados generasi penerus Bali. Pinunas titiang sumangdane budayane nenten rusak tur punah, ngiring sareng-sareng lestariang budaya Baline. Nanging, Indik ngelestariang seni lan budaya sane kaanggen ngajegang Bali punika nenten je wantah uning lan prasida minekadi maigel-igelan kemanten nanging taler prasida antuk mabasa Bali, matata krama Bali lan tetep ngemargiang kekaryan adat keaagamaan agama Hindu sane lianan. Krane nike sane nyihnayang budaya Baline. Indik mabasa Bali punika, patut kalaksanayang seraina ring kulawarga soang-soang. Alit-alite mangda kaajahin nganggen basa Bali seraina ring kulawarga. Saantukan sane mangkin akeh kapanggih alit-alite nenten je nganggen basa Bali, utamannyane sane magenah ring kota, krane seraina kaajahin nganggen basa Indonesia ring kulawargannyane. Panadosnyane alit-alite merasa meweh ritatkala nganggen basa Bali. Malarapan antuk punika dahat penting pisan alit-alite kaajahin mabasa Bali ritatkala mapasuitran. Utsaha sane tiosan sane patut uratiang lan kalaksanayang ngajegang Bali, inggih punika sareng-sareng ngawiwitin antuk malajahin miwah ngelestariang kesenian lan budaya Bali minekadi sasolahan igel-igelan, madharmagita utawi makidung, malajah lan ngelestariang seni tetabuhan utawi gegambelan, malajah majejaitan, tetep ngamargiang tradisi lan budaya  ngarya ogoh-ogoh, miwah ngadakang sekancan acara-acara lomba sane prasida nincapang kawentenan budaya lan seni Baline.

   Sane mangkin ngiring pikayunin sareng sami, sapunapi tata carane mangda budaya Bali prasida prasida ajeg kantos kapungkur wekas. Masyarakat Baline saking dumun sampun gotong royong, nyinggihang rasa sagilik saguluk sabayantaka, mangda prasida ngemolihang kasukertan. Manahang tityang utsaha sane prasida anggen ngajegang seni lan budaya Baline nenten sios wantah agama agama Hindu lan adat istiadat Baline sane kaloktah Tri Hita Karana. Tri Hita Karana mateges tetiga sane prasida ngawinang karahayuan iriki ring jagate.

Sane kapertama kabaos Prahyangan teges ipun ngutamayang pawangunan linggih para dewata minakadi mecikang genah-genah suci sekadi sanggah utawi pamrajan, pura dadya utawi paibon, pura khayangan tiga miwah khayangan jagat seosan sane pinaka linggih Ida Shang Yang Widhi miwah bhatara-bhatari, genah ngaturang pangubakti nglungsur karahayuan manut dharmaning agama.

Sane kaping kalih Pawongan mateges nglimbakan tata kramaning kahuripan manusa mangda prasida saling asah, asih, asuh ngulati kesukertan jagat madasar antuk tata karma sajeroning awig-awig, tata agama.

 Sane pinih untat punika Plemahan, sukseman ipun mautsaha miara “alam lingkungan” I raga, sane matetujon mangda prasida ngamolihang kahuripan lank eta raharja. Utsaha sane patut kalaksanayang minakadi sayaga kaarsriang lan kelestarian alas, gunung, danau, segara, pretiwi lan beburon nyane.

Budaya Baline patut kapiara mangda ajeg, kukuh tur nglimbak matetujon sumangdene trepti sentana, alit-alite ri wekas prasida name gumi Bali puniki sane lestari, taler kaapti prasida nudut para wisatawane rauh ka Bali. Antuk punika sampun sepatuta sareng sami nglaksanayang Tri Hita Karana sajeroning kahuripan boya ja uparengge sajeroning lambe kewanten.

Adat Baline sampun ketah pisan setata Susrusa maparilaksana ngrajegang budaya Baline. Busana sane lumrah kanggen rikala nyanggra pakaryan dinas. Janten pacang mabinayan ring busana kalaning nglaksanayang pakaryan adat miwah agama. Umpami rikala pacang nglaksanayang upacara Dewa Yadnya patut nganggen busana pamuspan, marupa wastra, kampuh, kuwaca miwah destar antuk sane lanang, raris wastra, kebaya, anteng, saha mapusungan ring anak istri.

Busana-busana punika sajaba wastra, lumrah nyane mawarna sarwa putih utawi kuning. Sakewanten rikalaning nyarengin indik upacara pita yadnya utawi pengabenan, miwah pawiwahan kangkat nganggen busana payas  madya utawi agung.

Anake sami pinaka pangayah utawi rikala ngayah. Sadereng unteng upacarane, lumrah krama baline mabusana adat madia. Sane lanang  mawastra, maambed, miwah madestar batik, raris sane istri nganggen taler busana adat madia saha setata mapusungan.

Wantah asapunika atur-atur tityang ring galah sane mangkin, tegesnyane  yening irage pacang ngajegang Bali puniki sepatutnyane irage sareng sami soang-soang  ngawiwitin antuk malajah lan ngelestariang seni miwah budaya Bali  ngawit saking mangkin mangda seni lan budaya Bali tetep ajeg lan lestari. Malarapan antuk punika ngiring mangkin irage sareng sami urati lan sareng-sareng malajah miwah ngelestariang seni lan budaya punika mangda prasida ngamolihang ajeg Bali. Inggih duaning wenten iwang ring napi sane aturang tityang iwau, ring galah puniki lugrayang tityang ngaturang geng rena sinampura. Inggih kaping untat sineb tityang antuk ngaturang Parama santi

“Om santih, santih, santih Om”.